t Evengelie volgens Matteüs 09
01Hai stook mit boot t meer over en kwam in zien aigen stad.
02En kiek ais: lu brochten n lamme man noar hom tou. Hai lag op bèr. Jezus zag heur vertraauw en zee tegen lamme man: "Kop ter veur, beste man! Zunden binnen die vergeven."
03Paardie schriftgeleerden zeden onder nkander: "Dij man doar, lastert God!"
04Jezus zag wel wat of ze dochten. Hai zee: "Woarom heb ie zokke kwoaie gedachten?
05Wat is t makkelkste? Zeggen: zunden binnen die vergeven, of: stoan goan en lopen?
06Mor ik zel joe zain loaten dat Menskenzeun macht het in wereld zunden te vergeven" - dou zee e tegen dij lamme man: "Goa stoan! Pak dien bèr en goa noar hoes tou."
07Loat e nou stoan goan en noar hoes tou lopen!
08Mensken dij dat zagen stonden der versteld van. Ze prezen God dat e mensken zo'n macht geven haar.
09Jezus ging doarvandoan wieder. Hai zag ain bie t tolhoes zitten. Man haitte Matteüs. "Goa achter mie aan!" zee Jezus tegen hom. En hai kwam in t èn en ging achter hom aan.
10 Dou Jezus bie hom thoes zat te eten, schoven der n bult tolboazen en aander lu dij t mit wet nait zo naauw nammen, bie Jezus en zien leerlingen mit aan toavel.
11 Farizeeërs zagen dat en zeden tegen zien leerlingen: "Woarom et joen meester mit tolboazen en wetsovertreders?"
12 Hai heurde t en zee: "Wèl of niks mekaaiern, hebben gain verlet om n dokter, mor dij wat onder leden hebben aal.
13 Ie mouten onderhaand ais leren wat of t zeggen wil: 'Omdenken wil ik van joe. Gain ovvers!' Ik bin nait kommen om rechtveerdegen te nuigen mor zundoars."
14 Johannes zien leerlingen kwammen op hom tou: "Woarom vasten wie en Farizeeërs aal, mor joen leerlingen nait?"
15 Jezus zee tegen heur: "Kinnen gasten op n bruloft den verdrait hebben zolaank brudeman bie heur is? Mor der zel n tied kommen dat brudeman van heur votnomen is en dén zellen zai vasten.
16 Gain mensk stokt n old jak oet mit n nije lap. Opzette lap scheurt ja van t jak òf en scheur wordt slimmer.
17 Ook dut gainain nije wien in olde zakken. Dut e dat aal, den scheuren zakken. Wien lopt ter oet en zakken binnen ook weg. Nee, jonge wien dut men in nije zakken. Dén blieven ze aalbaaident goud."
18 Hai was nog mit heur aan proat dou n vernoame boas op hom tou kwam. Hai vuil veur hom deel. "Mien wichtje is net overleden," zee e, "tou, leg joen haand op heur en ze zel weer leven!"
19 Jezus kwam in t èn en ging mit zien leerlingen achter hom aan.
20 Nou was doar n vraauw dij al twaalf joar laank mit vluien te doun haar. Zai kwam van achtern op hom tou en kwam zeum van zien klaid aan.
21 "As ik ja bloots zien klaid aanroak, zel ik red wezen," zo zee ze bie zokzulm.
22 Mor Jezus draaide zok om, zag heur en zee: "Moud nait verlaizen, mien wicht! Dien geleuf het die red!" En vraauw was op slag hulpen.
23 Dou Jezus in vernoame boas zien hoes kwam, zag e de floitspeulers en n haile koppel jammernde mensken.
24 "Wiek joe!" zee e. "t Wichtje is ja nait sturven, mor ze slept!" Zai laagden hom oet.
25 Dou t volk der oetjagd was, ging hai tou t hoes in, pakte heur bie haand en t wichtje wer wakker.
26 En proat doarover ging dij haile kontraain deur.
27 In tied dat Jezus doarvandoan wieder raaisde, gingen twij blinde lu achter hom aan. "Heb omdenken mit ons, Zeun van David!" raipen ze.
28 Dou e in hoes goan was, kwammen dij blinde lu noar hom tou. "Vertraauw ie der op dat ik dit doun kin?" vruig Jezus heur. "Joa wis, Heer!" zeden ze.
29 Hai kwam heur ogen aan en zee: "Wat ie leuven, zel gebeuren!"
30 Dou gingen ogen heur open. Jezus stuupte heur stief in: "Paas ter veur op dat gainain t te waiten komt!"
31 Mor zai gingen vot en muiken hom in ale kontrainen bekend.
32 In tied dat zai votgingen, wer der n man bie hom brocht dij bezeten was. Hai kon ook niks zeggen.
33 Dou kwoaie gaist oetdreven was, begunde stomme man te proaten. t Volk zee verboasd: "Zukswat heb we in Israël nog nooit beleefd!"
34 Mor Farizeeërs zeden: "Deur kwoaie gaisten heur boas drift hai kwoaie gaisten oet!"
35 Zo trok Jezus deur loug en stad. In heur sinagoges gaf hai mensken onderricht. Hai verkundegde t grode nijs over t keunenkriek en muik ale zaiktes en ale kwoalen beter.
36 Dou hai aal dij mensken zag, kreeg e t slim mit heur te doun. Zai wazzen ja net n koppel schoapen, opjagd en zunder hedder.
37 "Der is n bult koorn riep," zee e tegen zien leerlingen, "mor aarbaiders het t nait over.
38 Ie maggen doarom boas van t laand wel beden dat e aarbaiders stuurt om te zichten."
|
